Myen hpyen gumra 100 ram, Myitkyina kawn Manmaw de lai

By KNG

Myen hpyen gumra 100 ram hpe, hpyen mawdaw 10 ram hte, Myitkyina kawn Manmaw de, November 10, mani bat masum ya shana de htaw mat wa sai lam, chye lu ai.

Hpyen mawdaw kaba langai kaw gumra 10 grupyin htaw tawn let Myitkyina-Manmaw mawdaw lam hku nna, Manmaw de htaw mat ai re lam, mawdaw lam mayan na myi-chyaw-mu buga masha ni tsun ai.

N’Mawk buga masha langai mung Htai mungdan daju Kachin News Group shiga dap de tsun ai gaw, “Gumra dap nga nga ai Manmaw de, ndai zawn Myitkyina hpyendap na gumra ni bai htaw la ai gaw shawng de n nga ga ai. Laklai ai lam re”.

Hpa majaw, hpyen gumra ni hpe Myitkyina kawn Manmaw de htaw mat ai hpe gaw ya ten du hkra, hkrak n chye lu shi ai.

Shawng de gaw, Myitkyina na Myen hpyen gumra ni hpe Gang Dau Yang mare hku nna, tinang hpyendap KIO ginjaw dingsa Nahpaw Bum de machyu pala htaw sa ai lam ni galaw wa sai lam, Waimaw buga masha langai tsun ai.

Bai nna, mani na nhtoi hta sha, Myen hpyen hpung langai gaw, Myitkyina, Nawng Nang kawn KIA dap 11 de man yawng wa sai lam, KIA shiga lawk tsun ai.

Nov. 7 Myen mung Ralata Poi shani kawn Myen hte Democratic Karen Buddhist Army (KDBA) lapran, matut manoi gap hkat nga ai mabyin hpe, KIA gaw ahkyak da let yu maram nga ai lam, KIA du salang ni tsun ai.

Raitim, ya ten, Jinghpaw mungdaw kata, Myen-KIA lapran, hpyen masa ningnan bai shaja hkat ai lam ni, kaga mi n nga ai lam, KNG sagawn chye lu ai.