N’HTOI; - 24-11-2010
Ya dai ni;-
Wa nang ninghtoi wan, Ninghkaw galai hpraw seng san
Kabu hkinlum lu, Sumsan mani byu ai shani.
Ndai;-
Jan Pru tsawm ai naura. Alen Bum a shingma.
Daru Ninghpum rin, Magam ninghtawn sin.
Lawt kawt masing hpaw, Woi awn ladat shaw ai
Ginjaw Uphkang Dap a, Nlung nnan sha poi hta
Nhtum n wait saw myit the, shaman ya ai chyeju hpe
Ninghpa manaw the hkri-awn, Shagawp ga the lu kung dawn ai
majaw
Matum mahta hpan sagya, matsaw ningtsa Karai Wa hpe
Salum kata hkap hkalum, Ndang tsun hkra chyeju dum nngai law …
Dan la shu mu la sai, Nlung nnan hkai nmai.
Chyeju shakawn na matu, sa du sa lawm marit ngu
Maisau laika hte htinglet, Nbung shiga the numhtet
Mali yin masat n’shaga, n’htoi din ningdat n’ginta dat yang
Myit lawm hkum lawm n’gunlu, kabu gara yawng sa du.
Chyurum hpu nau sai gag a. My tsaw n sen ngoi gara.
Myit hkrum mang rum ai mahtai, kabu myit dik nga ga ai.
Dai ni du sa ai; -
Wa Jau, Hpung Up, Sara Hkristan Ningbaw Ningla
Yu bak krung hpe mahkrai hkrai, sumsing hkran de dun shalai
Lamu hkawawt chyinghka hpaw, asak janmau woi dagraw na ni.
v Myu a lam woi ningshawng, Mung a htoi tu gintawng
Wunhpawng ni a Ginjaw Jum, Chyurum ni a gindai hpum
Shajup shangang pali, masu shatsawm Pasi.
Nga mai ringhkang, Hkringmang Mung Up, Du, Gyi, Salang ni
v My tsaw shayi hkawn set, chyurum wunpawng sai jet.
Shangai chyinghkai Kanu, mayat nli hputdu.
Wunpawng amyu shalat, shi shih hkun hkun shaprat na ni.
v Ramrawt tsawm abrangla, Manai tsawm rung chyauhpa.
My a makawp ninggang, Mung a maga ningmang.
Wan panglai hpe shingtawt, Je hpre hpyen hpe sharawt.
Padang ninghkawng gala, Share jaubu kaba ni.
v Karai mungdan maden, Sa sana magma shachyen,
Mungga sha-it kaba, Chyum jawm de na du sa ai ni.
v Prat dep hpaji shakut, Mungkan madang shachyut.
Dakkasu jawng num, Jawng La, My a kamhpa shara ni.
v Nu Wa Mungchying shawa, n htum hkayan kaba.
Rawt Malan lam a dawnu, shamyet lawm ai lungpu.
Karai chyeju aw law, Du sa shawaw yawng gaw.
Chyeju shanip n-pu pyi, Sindai kraw wang masin tsi
Nwi pyaw hkam kaja wunlu lu, myitmu samsu mu ga ngu.
Akyu phyi let hkap tau, Shagawp ga the shagrau.
Machyan chyingboi madat, hkungga lara masat n ngai law …
Anhte jau man masha rai, Numdu numdai tai ai ni.
Hkalum hkala n chyoi, shachyen shaga n hproi.
Ra rawng ai lam mi nga, A dawng shingman mi kra yang
Shatan n’hkan Ga n wan, Jahpoi asawng shi n htawn.
My tsaw myit the mara raw, shadum sharai n’gun jaw la marit …
Aten shagu tsaw dinggrin, lu na sha na jaw n jin.
Asak hka hpawk kaba tai, jaw ya wunli zinghka ai.
Hpan da madu Karai a, chyeju shakawn ai hpawng hta
Chyurum ni a gam maka, mabyin lam hpe yu kahpra.
Kraw kata atet katu, salum sai hta nan prut pru ai.
Kraw dung madai n sen hpe, Nu/Wa Hpunau ni hpang de
Mu chye ai mi sawn shachyaw, myit dum ai mi tsun shapraw dat
n ngai law …
Chyurum Wunpawng sha ni a, makam masham htunglai hta
Hpu nau lapran sumprat dit, wenyi sak hkrun lam shayit,
Chyingtaw lakung woi shatsawm, Na pa sumla woi dingnyawm.
Hkristan makam hpe shaprai, Bukda Naingngan daw shatai na.
(40) ning masing hpaw, ta tut bungle hkrang shapraw.
Hpyen wa a masing kaba, amyu shamat na masa the
Makam masham htunglai the, hkrung ai karai mungga hpe
Madu ra ai hkrang shapraw, Tsa Dan n rung htawn shachyaw.
Myit lu ai hku hkaw shawam, Sagu hpung hpe lam shadam
Lucifa a dat kasa, myihtoi masu ni kaw na.
Sagu hpung hpe shim lam jaw, Ladat hpaji tsam shapraw nga ga.
Bawm sinat n sen n-ngoi, machyu pala mung n poi.
Si du a gap pala, nga rai wan bawm NUCLEAR.
Nang hpam hpe laknak shatai, Wunpawng Hpung de gap ayai.
Share shagan myit shamat, myit masin laknak jahkrat.
Hpawt ni na ningbaw ningla, galai ningnaw htum mat hkta
Masing masa kaba daw, mawlanyet kaba shachyaw ai.
Matse labye hpyen wa a, nanghpam majan kaba hta.
Lawt kawt lu na ladat shaw, makawp maga dun shapraw na
Mungshawa hpyenla n ginhka, sak kung ramma n lata.
Pat jasan masing awng dang hkra, shang lawm gunhpai shakut ra sai.
Kanu langai kaw na lat, Kawa langai kaw na prat.
Madoi chyu hpang rau jawm chyu, sinwa hka shawn rau jawm lu.
Ginru labau gindai rum, Ginsa majun ningpawt hkrum ai.
Chyurum wunpawng sha ni hpe, manawn masham ai myit the
Sai garan sumprat mala, sindun sumri dan ahka.
Ginlawm makai lahpaw hpyan, Dinghtan shabawn gang garan.
Labau masu gyin shalat, tengman mabyin hpe shamat.
Chyasam man chyang wa shyinglau, Wunpawng jet jet na laprau.
Wunpawng lakung mying shaprai, ninggyi mayam my shatai
Hpatwat wa hkrang masha, rudi kata byin hkra.
Hpyen wa wushoi dun ai de, hkan nang hpunau ni yawng hpe
Dun a gang gahkyein la na, anng ngai yawng a lit kaba rai nga sai.
Wuhpung Wuhpawnf a ka-ang, law hpa myit nli gat bang
Ntsa kaw kajin chyai shoi, kata de Nga myek makoi
Kan wang bungle masing hpaw, Bunghkup shan ladawn jaw
Myu tsaw Mung tsaw myit jet prai, sha lawa tingnyang hta ning ngai.
Dumsu dingla wuhpung hta, Ningba sharaw rim amya
Gasat gala majan hpe, Mungbawng saboi ntsa de
Htingrai htingrat gamung dup, Lang the lang bawngban jahkrup
Shagrit shanyem lai masa, akroi anoi baawng ga nga
Sinpawt la htet myit shazim, Lajin laroi tsun yu tim.
Nai lap hta nstin jaw, Ningga wa a laphyaw phyaw.
Mung masa chyinghka n mai hpaw. Ahkaw ahkang nan n jaw.
Mahtai kaja n woi tam, laknak Zing na mahkrun gyam
Ma a Wa lagaw hpyi aput, jarit sin hpyen tai hkrai shadut.
ႏိုင္ငံေတာ္ဖြ႕ံျဖိဳးေရးစီမံကိန္း Wunpawng ni a yi sun zing.
Nhprang sut rai krawk manaw, Nepyidaw kaw Lup shachyaw
Aten chyinghkraw gang sharen, Sai chyup katsi majan ten.
Dinghkrai magma Lahkum daw, Ningbaw shaje mung grai law
Numsun Numshe woi dumbrat, Tai hpyen luksuk shalaw jat.
Gara gaw mung shawa agawng malai, kadai gaw tiggyeng kandang hpai.
Mungshawa hpe sawn shapraw, mahtai kaja mung she jaw la marit
Myu hpe gawn hkang shangang, Mung hpe pawnba mazang
Ugut gu ningshawng hpuba, prat wai lam woi Usa ni a
Magun lahpa galai, Ningsang magam ahprai na.
Prat asak ram ai Ramma, Shayi/shading mahkra.
Makam masham lashum shawt, Ja chyum mungga labang pawt
My sha lawt lu na mahkrun, makam karai the hkridun
Makawp ninggang mung n tat, masing masa n shamat
Pandung langai hpe jawm yu, Magam langai hta rau hpru rai yang.
Chyoi pra ai wyenyi a, teng man tara ai lam hta
Lawt kawt lu na lam madun, gahkyin gumdin nga shangun
Myit nyan ningja woi shapraw, n gun lapyin shaman jaw
Matse hpyen a yaw ginjang, wunpawng ni hpe n lu dang
Shagrit magang grau tsaw jat, shamyit magang grau mayat.
Lamun hpunmyi prut marawng, latsa ningnaw rawt dinghtawng
Ninghkawng jan zawn htoi gala, Dan hkung ai amyu tai wan a saga ai.
Daini; -
Dip ai lungbyen hpe ka-aw, gyit hkang sumri hpr jawm raw
Daru magam ahkang lu, Awm dawm shaglawt na matu
Hkrit tsang ai myit hpe shamat, N den marai myit shalat
N’gup n-gau ya jang hpaw, teng man lam hpe tsun shapraw
Tara ai majan a matu, Gwi gwi rawt tsap saga ngu
Nu, Wa, Hpu naw ni yawng hpe, Kamhpa kaba ai myit the
Shadut shatsawm ga numhtet, Lajin laroi gad aw let
Ninghpa manaw hpe shazim, shagawp aga hpungdim n ngai law
Mali Zaini
No comments:
Post a Comment
Post နဲ ့ပတ္သက္ျပီးထင္ျမင္ခ်က္မ်ားကို ေရးသြားနိင္ပါတယ္၊